اليوم بتوصلني سيارة من عن طريق الإمارات، واليكم كل التفاصيل شراء سيارة من الإمارات.
اول شيء بحثت عن السيارة المناسبة عن طريق موقع
dubizzle.com/
اذا لقيت السيارة تأكد من التالي،
أن السيارة مواصفات خليجي أو يباني او اوروبي.
السيارات اللي جايه من امريكا غالباً تكون مصدومة او غراقنه ولا تدخل السعودية.
أسأل صاحب السيارة او المعرض من وين جايه السيارة وهل هي من الموصفات اللي قلت لك.
السيارات المستعملة ماتدخل الا اخر خمس سنوات.
يعني حنا اللحين في 2022.. يعني اخر موديل يدخل 2017!
ولازم تكون متوافقة مع كفاءة الطاقة السعودية:
تقدر تشيك من خلال الموقع الرسمي:
sls.saso.gov.sa/Pages/Vehicles
ودائماً يكون بالموقع السابقة وش موصفات السيارة:
مثال هذه اللكزس مكتوب تحت Regional Specs
ومكتوب جنبها GCC يعني موصفات خليجية وتدخل السعودية.
يفضل انك تروح بنفسك تشوف السيارة وتسوقها، منها اجازة يومين في دبي ومنها تجرب وتفحص! اطلع الصبح وتخلصها بيوم واحد.
بعدها إطلب المعرض تصديرها لك إلى السعودية.
وطبعاً لازم تدفع قبل يصدرها لك لسعودية، وتاخذ الحوالة 3 ايام من اي بنك سعودي. مالها داعي تجلس دامك صملت ادفع عربون.
تقدر تسوق السيارة بنفسك وتطلع لوحات تصدير إماراتيه، لكن الطريق بعيد وانت براحتك. لكن الخيار هذا موجود اذا تبي.
تكاليف تصدير السيارة الحكومية من اوراق وإجرائات 620 درهم.
زد عليها 300 درهم اذا تبي تسوقها بنفسك (تراني مو متأكد من السعر مره).
اذا ماتبي تسوق:
تتفق مع شركة شحن، التكلفة 1700 - 2000 ريال
انت وشطارتك في المكاسر.
لازم تعطي المعرض الرخصة التجارية لشركة الشحن تقدر تاخذها من راعي السطحة.
بعد ماتتصدر السيارة من الإمارات وتصير على السطحة، لازم تتفق مع مخلص جمركي.
ياخذ 650 ريال لكل الشغلة.
اذا وصلت السيارة جمارك البطحاء (منفذ السعودية والإمارات).
بتدفع 20% ضريبة قيمة مضافة + جمرك
اذا السيارة موديلها اخر سنتين.
بتدفع ضريبة 15% فقط. دون جمرك.
لن يتم إعتماد سعر شراء السيارة، وسيتم تسعير السيارة من قبل جمارك السعودية.
مهما جبت من فواتير وغيرها، سيتم تسعير السيارة من جمارك السعودية وبتدفع حسب القيمة اللي يحددونها من مركز الموحد في الرياض. يعني لا تبلش حقين جمارك البطحاء ترى مابيدهم شيء.
رح تدفع 300 ريال عشان تنزل عليها لوحات جمركية وبتكون بلون الأسود عشان تقدر تسوق السيارة اذا وصلتك بسلامة..
عندك 14 يوم..
تروح تطلع البطاقة الجمركية + فحص دوري + تأمين + لوحات وإستمارة.
عاد اذا وصلتني السيارة كتب لكم التكاليف هذه.
اي سؤال انا حاضر.
السؤال الحقيقي:
هل الحوسة هذه تسوى؟ شخصياً وفرت 65 الف ريال سعودي من قيمة السيارة حتى بعد كل المصاريف.
مو كل سيارة كذا، السيارة اللي كنت ابيها سعرها مبالغ فيه بالسوق
تحياتي.