عن السفر والعيشة برة!
مبدئيًا لو سألت حد مسافر وخصوصًا اللي مهاجرين ومستقرين عن البلد اللي عايش فيها وقالك وحشة وبيطفوا سجاير تحت دراعاتنا، قوله إرجع وأنا أخد مكانك عشان بحب السجاير على الريق.
نحط دي على جنب بقى!
نكمل السرد 👇
(1)
عايز تنجح بسرعة وتستقر؟
يبقى تروح وعندك لغة جيدة ومعاك مهارة أو إتنين كويس فيهم قوي.
وبرضه مش هتروح تلاقي موكب في المطار، وبيشكروك عشان اختارت بلدهم، لكن هتتعب شوية وهتشتغل في حاجات أبعد ما يكون عن مجالك، لغاية ما تلاقي حاجة مناسبة، وده طبيعي جدًا.
(2) 👇
توقع شوية عنصرية من البعض، ومتدبدبش في الأرض وتقول شوف بيقول عنصرية أهو،أنت في بلدك بيعنصروا بحسب المحافظة والقرية والمركز واللهجة والدين وكل حاجة تقريبًا، فمتعملش مانديلا، القانون معمول عشان يعامل الكل زي بعضه بغض النظر هو مين، وتقدر ترفع قضية على أي حد أو جهة عادي جدًا.
(3) 👇
لو مسافر ومفيش لغة ولا مهارة، يبقى هتتعذب جامد وهتتعب، لكن لو عايز فعلا تتغير وتبقى حاجة وصادق مع نفسك وراجل، هيحصل… بس هياخد وقت.
لأنك بتبني نفسك من الصفر ويمكن من تحت الصفر بشويتين.
(4) 👇
لو اختارت عيشة الفهلوة،فممكن تعيش، بس هتفضل طول عمرك عايش مع ناس في أوضة، بتاكل أي كلام، بتشتغل يوم وتقعد ١٠، مديون، مضغوط، وحاجات تانية كتير، يعني مفرقتش كتير قوي عن اللي أنت فيه.
يعني خيارين… يا تتعلم وتغير نفسك وتبني حياة، يا تختار الفهلوة وتعيش تحت الخط طول عمرك.
(5) 👇
وأنت مسافر "لازم" يكون معاك مبلغ يمشيك ومتروحش وأنت على الحديدة تماما.
الكلام ده كان زمان، لكن دلوقتي، الأفضل تروح ومعاك فلوس.
بتزهق وبتمل، يبقى يا تتغير، يا تخليك مكانك، عشان مش هتنفع.
حساس وعينيك بتحمر وشعرك بيتنكش من أي حاجة، يبقى يا تتغير يا تخليك عندك.
(6) 👇
أنت جاي في مجتمع جديد، بقيم وأخلاق وثقافة، مختلفين تماما عن كل اللي اتربيت عليه، فتعايش وتأقلم، وحط في دماغك وأفهم أنك مش هتغير حاجة فيهم.
(7) 👇
محدش هيمنعك تمارس عبادتك ولا تلتزم بعاداتك اللي اتربيت عليها، لكن متفرضهاش على حد، ولا تحكم على حد، وده موضوع صعب على بعض الناس… معلش، ولو مش هتقدر خليك عندك برضه.
هتدفع ضرايب ورسوم تانية في بعض البلاد.
(8) 👇
وده طبيعي جدًا، بس هتاخد قدامهم "في غالبية البلاد" خدمات حقيقية، زي الصحة والنضافة وفي بعض الحالات سكن ومرتب شهري وتقاعد وغيره.
(9) 👇
فيه بلاد زي إنجلترا، بتغطي ١٠٠٪ صحة للمتقاعدين وبعض الحالات الخاصة، ده غير السكن والمرتب الشهري، ومبالغ استثنائية سنوية، في حالات زي البرد الشديد أو الكريسماس أو ارتفاع الأسعار.
هتسافر قانوني، هتستريح وهتتحرك بسرعة.
(10) 👇
هتسافر فهلوة هتتعب قوي ولو معرفتش تظبط وضعك وده "وارد جدا"، هتعيش زي الفهلوي اللي قولتلك عليه في الأول.
لو هتتجوز عشان الجنسية بس ودافع فلوس، فخلي بالك أنكوا بنسبة ٩٠٪ هتتقفشوا.
(11) 👇
لو قررت تتجوز من البلد اللي أنت فيها، فلازم تختار كويس قوي قوي قوي، ولو من الناس اللي مبيعروفش يتأقلموا أو مش مستعد تعيش زيهم أو مبتعرفش تصبر وتغير بالعقل، يبقى خليك في جاليتك أحسن عشان متقعش في مشاكل أنت في غنى عنها، وهتشغل دماغك وتشيلك هم.
(12) 👇
اتجوز اللي شبهك واللي تعرف تتعامل معاها، وده عمومًا في الجواز يعني. مش من الأجانب بس.
(13) 👇
إنسى قصة المميزين والاحتفال بالإنجازات الصغيرة اللي كبرت عليها دي، محدش مهتم بيك ولا عملت إيه ولا صحيت الساعة كام ولا قريت كام كتاب، فيه دول الوزرا بيروحوا الشغل بالعجل وفي المترو، ومحدش بيهتم.
أنت بتعمل لنفسك ولدايرتك الصغيرة جدًا.
(14) 👇
طرق السفر القانونية كتير، مابين دراسة،وشغل واستثمار وجواز ولجوء،حتى فيه دول عندهم فيزا للمخطوبين.
مفيش مطعم ولا شركة، بتبعتلك من الهوا تقولك "بنترجاك تشتغل معانا"، وهنديك تلتلاف دولار،بس عايزين منك ١٠٠ دولار عشان الفيزا وهنديهملك لما تيجي.
كل ده كلام فاضي ونصب ومش حقيقي
(15) 👇
لو قدمت على شغل في بلد واتقبلت في الشغل، فالشركة هتتكفل بكل حاجة لغاية ما توصل عندهم، ولو هيدفعوك حاجة، فهتتخصم من مرتبك على دفعات بعد ما تشتغل، وحتى ده مش قانوني وممكن يكون فيه حوار.
(16) 👇
توقع اللي من نفس بلدك يبعدوا عنك، وتوقع برضه أن محدش يساعدك، فمتاخدش على خاطرك قوي واطلع من حالة "اللي مني مزعلني" بسرعة، مفيش وقت للكلام ده.
لكن أنت متبقاش زيهم، ولو عرفت أن حد محتاج "حقيقي" مساعدة، يبقى ساعده باللي تقدر عليه، وخلي بالك برضه.
(17) 👇
وأخيرًا أفضل مكان يعرفك كل المعلومات الخاصة بالبلد، هي سفارتها ومكاتبهم الحكومية المعتمدة في بلدك، لكن مش "الرحاب للعمالة".
معلش كلمتين تقال على البعض، بس كتبتهم بكل صدق وأمانة وعن تجربة طويلة.
(18) وانتهي السرد
يومك فل